Bookmark and Share

Suprastanza voul soluziun electronica «Tweebie» per post d’infurmazin turistica

Zuoz In occasiun da sias tschantedas düraunt ils mais da december 2016, schner e favrer 2017 ho il cussagl cumünel da Zuoz traunter oter decis il seguaint: Fabricas: La Diagonela, Zuoz, per la montascha d’üna reclama vi da la chamanna dal Golf, Resgia; Maja ed Andrea Gilli, Zuoz, per l’ingrandimaint da duos fnestras existentas vi da la Chesa Gilli; Lyceum Alpinum AG Zuoz, per l’ingrandimaint dal indriz Fives Courts; Hedwig e Roland Raths-Bleiker, Freienstein, per l’installaziun d’ün indriz da fotovoltaica vi da la fatscheda da la chesa nr. 139 in Chavazzaglias; Peter L. Plebani, Zuoz, per la construcziun d’üna terrassa per la bar süll’Acla Buera.

Chesa da parker Centrel: L’avertüra dal parkegi vain organiseda in sanda, ils 17 gün 2017 tenor ün program speciel.

Fittaunza da plazzas da parker: Il cussagl es unanimamaing da l’avis da tegner bass ils predschs, per cha’l parkegi gnia eir frequento e discuta eir las pussibiliteds da fitteda per ün’eivna, ün mais ed ün an. Fitteda per quistas düredas paun gnir fattas, ma sainza garanzia per üna plazza, siand cha nu vegnan reservedas üngünas plazzas cun tevlinas individuelas dal fittadin. A vegnan decisas las seguaintas tariffas: Da las 07.00 fin las 19.00: prüm’ura gratuita, zieva ün franc per ura. Da las 19.00 fin las 07.00: 0.50 francs per ura. Fitteda per set dis 70 francs, fitteda per ün mais 150 francs, fitteda per ün an 1400 francs. Discussiun tariffas ulteriurs parkegis: zieva avair definieu ils predschs i’l parkegi centrel tratta il cussagl la dumanda da las tariffas da tuot ils oters parkegis in vschinauncha. Il cussagl es da l’avis cha quistas tariffas stöglian gnir adattedas per render pü attractiv il parkegi centrel. Impü es da decider sur da l’andamaint a reguard las cartas stagiunelas ed inua cha telas dessan in avegnir auncha valair u na. Zieva cuorta discussiun decida il cussagl il seguaint: Plagnoula suot, Plaz e Tuor: ün franc per 30 minuts, üngünas cartas da parker. Plagnoula/ Via Nouva e Purtum: duos francs per ura, sainza pauschela per di ed üngünas cartas da parker. Staziun: ün franc per ura, cun pussibilited da cumprer cartas da parker cun las seguaintas tariffas: 60 francs per ün mais, 600 francs per tuot an. Tuots quists parkegis restan a partir dals 1. meg 2017 in vigur düraunt 12 mais l’an.

Per glieud chi lavura a Zuoz do que las seguaintas pussibiliteds aint il parkegi centrel: Fit per ün mais, da las 07.00 fin las 19.00: 75 francs al mais. Fit per tuot an, da las 07.00 fin las 19.00: 840 francs l’an. Tariffa per autos electrics: il cussagl decida da stipuler üna tariffa pauschela da tschinch francs per charger la batteria d’ün auto electric. La cassa vain programmeda in quist sen.

Decisiun a reguard trafic in Via d’Aguêl: In connex culla fabrica dal tunnel dal parkegi centrel vaiva la pulizia chantunela relascho ün permiss temporar per eriger üna via unica sülla Via Dimvih d’Aguêl. Davart d’abitants da quel quartier ho que do reclamaziuns siand cha stöglian fer ün lung viedi per river tar lur chesas. A dess gnir evaluo la pussibilited da stipuler üna via unica da la staziun sü fin tar la chesa Margadant süll’otezza da la Giassa Travers, ma da signaliser giò tar la cruscheda giò’n staziun bain visibel üna tevla cun «Via unica zieva 100 meters» uschè cha giasts chi nu cugnuoschan la situaziun eviteschan da river fin sü tar la Giassa Travers e da rester pendieus in tela. Il cussagl decida d’invier ils pass necessaris a reguard il permiss da la pulizia chantunela.

Dumanda Golf Engadin St.Moritz AG a reguard «Driving Experience»: La Golf Engadin St.Moritz AG vess la pussibilited d’organiser üna spüerta da cuors per ir cul auto sün naiv e glatsch düraunt ils champiunedis mundiels in favrer 2017, e que sül pro da la veglia deponia in Curtinatscha. La parcella tuocha a la vschinauncha ed il fittadin da tela ho signaliso ch’el saja perinclet cha’l pro possa gnir druvo per telas occasiuns. Il cussagl decida da relascher ün permiss temporar per la düreda dals champiunedis mundiels da skis, voul dir dals 6 fin als 19 favrer 2017.

Decisiun a reguard avertüra rait da fibra optica Swisscom: Il cussagl discuta l’agir da la Swisscom zieva cha haun bado cha la vschinauncha ho piglio per mauns la fatschenda a reguard üna rait da fibra optica culla Mia Engiadina. Sün maisa es ün’offerta da la Swisscom per invier las lavuors. Quellas vegnan fattas in mincha cas, ma eventuelmaing vegnan ellas realisedas pü ad ura. Il fil tuocha però a la Swisscom. Il cussagl es da l’avis da metter pais sül svilup da quista tematica insembel culla Mia Engiadina.

Decisiun a reguard installaziun hotspot in vschinauncha: A reguard l’installaziun da puncts da hotspot in vschinauncha s’ho fat divers sclarimaints. Previs es üna fasa da test da duos fin trais ans. Il sistem es già in vigur a San Murezzan e Puntraschigna ed offra ün servezzan optimel al ütiliseder. Üna applicaziun mobila «Engadin» chi vain elavureda salüda l’ütiliseder apaina ch’el aintra illa rait. La realisaziun dad ün u eir püs hotspots füss pussibla eir a Zuoz. Scu prüm dess gnir monto ün emettur vi da la chesa cumünela scu fasa da test per duos ans. Il cussagl deliberescha l’import bsögnaivel per effettuer l’installaziun il pü svelt pussibel.

Ulteriur agir stand da tir Suotarivas: Ün stüdi da canera elavuro dal ANU cun imsüras actuelas es avaunt maun e demuossa cha’l quartier Vuorcha es our dal perimeter pertucho. La radunanza cumünela da S-chanf ho d’incuort refüso la proposta dal cussagl per üna varianta simpla sainza ün stand da 300 meters uschè cha’s stu darcho ir sur ils cudeschs. Per Zuoz nu müda però ünguotta siand cha’l stand stu insomma gnir sano fin la fin da l’an 2019. Tenor plan da termins es previs da lascher saner il stand in utuon 2018. Scu già oriento cuosta ün adattamaint dal stand ca. 100000 francs, que chi pertuocha impustüt imsüras cunter la canera.

Turissem: Discussiun post d’infurmaziun turistica a Zuoz: In connex culla dumanda da la nouva ESTM AG scu cha’l post d’infurmaziun a Zuoz dess in avegnir gnir gestieu staun a disposiziun trais opziuns: 1. eliminer il post d’infurmaziun, 2. gestir tel tres la ESTM AG u 3. gestir tel tres la vschinauncha. La ESTM AG ho intaunt tratto cun tuot las vschinaunchas da la regiun e spetta üna prüma resposta la mited da schner 2017. Els füssan interessos da gestir las infurmaziuns turisticas per pudair garantir ün livel da qualited chi nu variescha da lö a lö. La cumischiun da turissem ho fingià fat ponderaziuns in merit ed es da l’avis cha’s stuvess chatter üna buna soluziun in pigliand in consideraziun eir il svilup digitel. Il böt dess esser quel da redür la spüerta da l’infurmaziun fisica sül lö e d’elavurer al listess mumaint üna soluziun electronica cun ün sistem numno «Tweebie» chi’d es in vigur eir a Zermatt, Puntraschigna ed otras destinaziuns turisticas. Eir tenor la ESTM AG fo ün’infurmaziun turistica a Zuoz be sen in cumbinaziun cun ün’otra spüerta, saja que la Retica u l’administraziun. Diversas dumandas sun da respuonder per pudair trer üna decisiun valabla, siand ch’ün eventuel contrat cun la ESTM AG gniss stipulo per üna düreda da quatter ans. A segua üna discussiun animeda inua cha vain discus la rolla da la Retica, ma eir da la Posta. Ad exista ün tschert ris-ch da perder quistas duos spüertas chi vegnan intaunt auncha nüzzagedas relativmaing ferm, chi però cul temp varon main frequenzas siand cha do nouvas soluziuns electronicas. Eir es da sclarir la rolla dal proget mia Engiadina e dals hotspots previs in vschinauncha chi faciliteschan la creaziun e l’adöver da soluziuns electronicas. La tschanteda culs respunsabels da la Retica ho gieu lö ed es steda fich positiva: la Retica nun ho üngün interess da gestir svess üna staziun a Zuoz, es però pronta da cuntinuer cul model sün maina-staziun scu fin cò, eir suot la bachetta da la vschinauncha. Da tratter sun ils termins dal contrat da fittaunza scu eir il fit svess chi pera memma ot. La cumischiun turistica ho eir tratto la tematica ed arcumanda al cussagl da mantegner l’infurmaziun turistica in staziun, impustüt in vista cha la Posta da Zuoz es fermamaing pericliteda e pudess gnir integreda in ün center da servezzan centrel. Our da quist motiv dess la vschinauncha piglier sü contact culla Posta per sclarir la situaziun. L’incumbenza per gestir il post d’infurmaziun turistica a Zuoz dess gnir surdeda a la ESTM AG per üna düreda da quatter ans. A dessan avair lö discuors regulers per definir ed adatter ils parameters dal contrat, siand cha’ls uraris d’avertüra dessan gnir adattos als bsögns turistics. Al listess mumaint dess però eir gnir elavuro üna soluziun electronica, scha mê pussibel dafatta scu proget regiunel in collavuraziun cun la ESTM AG. Il cussagl salüda quista proposta ed es perinclet cul agir.

Program evenimaints sted 2017: Il cussagl repassa il program dals differents evenimaints da la sted 2017. Il discuors da Zuoz ho lö in venderdi ils 28 lügl 2017. Il program pels 1. Avuost 2017 cun culazchun ho darcho lö sün Via Maistra. La festa d’alp da dumengia, ils 6 avuost 2017, vain organiseda aint in Alp Funtauna. A do differentas variantas per cumbiner la festa cun üna bella gita.

Educaziun e cultura: Cunvegna da prestaziun archiv culturel Engiadin’Ota: Quista lezcha gniva fatta fin uossa dal Circul e stu nouv gnir organiseda tres las vschinaunchas. Il cussagl repassa la cunvegna da prestaziun chi declera precis ils dovairs e las lezchas da la societed dal archiv culturel. Ad es stipulo ün tet da cuosts da 200000 francs chi vegnan scumpartieus tenor la clev da la Regiun süllas singulas vschinaunchas. Per Zuoz importa que ca. 12000 francs l’an. La cunvegna aintra in vigur ils 1. schner 2018 cun üna düreda da quatter ans. Il cussagl decida unanimamaing d’aderir a la cunvegna e d’integrer ils cuosts i’l preventiv 2018.

Concept lavur per giuvenils: Il cussagl piglia cugnuschentscha da la nouva varianta d’ün concept da lavur per giuvenils chi’d es gnieu elavuro da la gruppa da lavur. Las premissas sun quellas da chatter üna soluziun per tuot La Plaiv e d’integrer la giuventüna illa vita sociela da las vschinaunchas. As druvess localiteds adattedas ed ün mneder cun ün pensum da 60 pertschient chi organisescha la spüerta. Ils cuosts d’investiziun s’amuntan sün ca. 10000 francs (sainz’infrastructura) ed ils cuosts da gestiun annuels sün ca.

95000 francs. Il grand problem es da chatter la localited ideela. Forsa cha que dess la pussibilited d’organiser duos containers chi vegnan libers da la WM 2017 e da plazzer quels sül parkegi Plagnoula. Il böt es da scriver our la plazza pel cumanzamaint da l’an scolastic 2017/2018.

Trafic public: Cooperaziun publica: trafic public Engiadin’Ota: Il cussagl repassa ils nouvs statüts per ün consorzi da trafic public per l’Engiadin’Ota, üna lezcha chi vain accumplida dal Circul auncha fin la fin da quist an. La proposta es da funder ün consorzi chi’s cumpuona our da tuot las vschinaunchas cun üna delegeda, inua cha tuots sun rapreschantos. Il cussagl es perinclet cul agir e decida unanimamaing da suottametter ils statüts a la prosma radunanza cumünela la fin d’avrigl 2017.

Dumandas da sustegn finanziel: La gruppa da rock Prefix ho la pussibilited da fer ün concert düraunt las ceremonias da la WM 2017 a San Murezzan. Els vöglian registrer quist concert e dumandan per que per üna contribuziun. Il cussagl es pront da sustegner il proget cun üna contribuziun finanziela.

Infurmaziuns our da tschantedas da cumischiuns: Promulins: intaunt s’ho abino da funder üna SA chi’d es possessura dals terrains e chi fitta ils edifizis a la gestiun. Cun las vschinaunchas sura s’ho chatto la via per pudair ün di scumpartir il possess. Quist model vain discuto illa conferenza dals presidents e zieva suottamiss al cussagl cumön chi vess da decider in merit in marz 2017.

Cumischiun da turissem: la cumischiun turistica ho discus sur da la spüerta dal trenin da Varusch chi pudess gnir prolungio fin a Zuoz düraunt la prosma stagiun da sted. Da princip innò füss que üna spüerta attractiva per Zuoz scu lö da famiglias, ma cul iniziant as stu tratter las cundiziuns, insembel cun S-chanf. La situaziun dal nouv Kinderland sü Purtum cuntainta ma ad es da cuntinuer las discussiuns cul Lyceum a reguard la plazza da hockey.

Contrat Roth Gerüste AG: il contrat per ün dret da fabrica cun la Roth Gerüste AG per ün edifizi in Curtinellas es suottascrit. La construcziun dess cumanzerin prümavaira. Stand da tir da chatscha Zernez: ad es previs da saner il stand da tir da chatscha, siand cha S-chanf nu faro üngün indriz da quist gener. Las vschinaunchas da La Plaiv vegnan dumandedas per ün sustegn finanziel uschè cha las societeds paun nüzzager il stand giò Zernez. Zieva cuorta discussiun decida il cussagl da sustgnair il proget e da stipuler üna charta d’intent in sen positiv, ma da vulair tratter in detagl sur da la partecipaziun finanziela, chi stu auncha gnir definida.

Proget fibra optica: quist proget es sün buna via e la realisaziun cumainza quista prümavaira. Eir S-chanf ho aderieu al credit e voul realiser il listess sistem d’avertüra scu Zuoz. Uossa es da definir ils prossems pass operativs e da sclarir la situaziun cun la Repower a reguard l’adöver dals büschens.

Agir «proget sanaziun god/pascul Pradatsch»: la documainta es intaunt gnida elavureda ed il proget es pront per partir. Siand cha’ls cuosts sun previs aint il preventiv 2017 decida il cussagl d’invier las lavuors uschè cha po gnir cumanzo cun telas in prümavaira 2017.

Varia, orientaziuns, invids e termins: La Bar Tuor vain gestida inavaunt dal uster dal Allegra, e que fin la fin da marz 2017.

(cd)

Il cussagl cumünel da Zuoz tschercha üna soluziun per l’infuormaziun turistica futura.

fotografia: archiv PL

Bookmark and Share